Stefán Snær Konráðsson, framkvæmdastjóri Íslenskra getrauna og Íslenskrar getspár, sagði ástæðu hækkunarinnar vera þá að fyrirtækið væri í samvinnu við sænska getraunafyrirtækið Svenska Spel um 1x2 getraunirnar. Hver röð í Svíþjóð kostar 1 SKR sem var lengi nálægt ígildi um 10 ÍKR. Vegna veikingar íslensku krónunnar hefur sænska krónan hækkað í tæpar 13 krónur.

„Við fórum fram á það við dómsmálaráðuneytið að fá að hækka hverja röð í 12 krónur, en ekki 13, því við ákváðum að bera þessa hækkun með viðskiptavinum okkar. Við höfum tekið þessa gengisbreytingu alfarið á okkur frá því í febrúar síðastliðnum en getum ekki haldið því áfram endalaust. Því urðum við að hækka verðið á getraunaröðunum til að geta áfram verið þátttakendur í þessum sænska getraunapotti,“ sagði Stefán. Hann sagði að ef krónan styrktist aftur til muna yrði verð getraunaraða lækkað.