Silfrinu fagnað
Á þessu hafnfirska heimili var silfrinu ákaft fagnað. Margrét Theodórsdóttir
Þrátt fyrir að Íslendingar hafi tapað fyrir Frökkum í leiknum í morgun fögnuðu landsmenn því þó ákaft að þarna hrepptum við okkar fyrstu silfurverðlaun fyrir hópíþrótt.
Fólk safnaðist víða saman og meðal annars var horft á leikinn í Smáralind, Vodafonehöllinni, Haukahúsinu, Sambíóunum og Hamri á Akureyri.
Íslendingar létu tímasetningu leiksins að sjálfsögðu ekki hafa áhrif á sig og má leiða að því líkum að kveikt hafi verið á sjónvarpstæki á nánast hverju heimili á landinu.
Á myndinni má sjá heimilisfólk í heimahúsi í Hafnarfirði fagna ákaft góðu gengi Strákanna okkar á ólympíuleikunum.
Strákunum verður eflaust vel fagnað þegar þeir snúa heim nú þegar leikunum er að ljúka.
Þorgerður Katrín Gunnarsdóttir, menntamálaráðherra, sagði enda fyrr í vikunni í viðtali við mbl.is, að hún yrði starfandi forsætisráðherra þegar drengirnir kæmu heim og að hún myndi sjá til þess að ríkisstjórnin héldi stóra og mikla móttöku fyrir strákana.
