Iceland Express. mbl.is

Töluverð seinkun hefur orðið á flugi Iceland Express frá Keflavík til Friedrichshafen í dag, en vélin átti að fara í loftið klukkan 7 í morgun og er áætluð brottför klukkan 15 í dag.

Matthías Imsland, forstjóri Iceland Express, segir að seinkunin sé afleiðing bilunar sem kom upp í sömu vél í Kaupmannahöfn í gær.  Þá seinkaði flugi frá Kaupmannahöfn til Reykjavíkur umtalsvert en vélin átti að fara í loftið klukkan 13 á dönskum tíma  en brottför var áætluð klukkan fjögur í nótt.

„Töfin skýrist á bilun sem kom upp í vélinni í gær, það þurfti að yfirfara alla vélina af öryggisástæðum, og það getur tekið tíma," segir Matthías.  „Þegar svona kemur fyrir hefur seinkun áhrif á brottfarir næstu véla."

Bilunin í gær var uppgötvuð í hefðbundinni athugun flugmanns fyrir flugtak og voru farþegar fluttir frá borði.  Í fyrstu var talið var bilunin væri smávægileg en við nánari skoðun kom í ljós að bilunin var meiri en áætlað var og þurfti að flytja vélina í skýli og yfirfara hana. 

Matthías segir að farþegar  hafi verið látnir vita um leið og ljóst var að töf yrði á fluginu.  „Farþegar voru látnir vita með sms skilaboði til þess að þeir þurfi ekki að mæta í Leifsstöð," segir Matthías og bætir við að reynt sé að koma til móts við þá sem mæta í Leifsstöð með veitingum.