Ísafjörður mbl.is/Ómar Óskarsson

Menntaskólanemi var í síðustu viku sakfelldur í Héraðsdómi Vestfjarða fyrir vörslu ljósmyndar og 89 hreyfimynda sem sýndu börn á kynferðislegan eða klámfenginn hátt. Var maðurinn dæmdur í 45 daga skilorðsbundið fangelsi og til að greiða 83.664 krónur í sakarkostnað. Var myndefnið gert upptækt.

Ríkislögreglustjóri kærði piltinn fyrir kynferðisbrot, með því að hafa í nóvember á síðasta ári er hann var átján ára, á heimavist Menntaskólans á Ísafirði haft í vörslum sínum, á hörðum diski í fartölvu, 1 ljósmynd sem sýnir barn á kynferðislegan og klámfenginn hátt og 89 hreyfimyndir sem sýna börn á kynferðislegan eða klámfenginn hátt, þar af ein hreyfimynd af barni í kynferðisathöfnum með dýri, allt myndir sem pilturinn aflaði sér af netinu og vistaði á framangreindan tölvubúnað á tímabili frá síðari hluta árs 2006 fram í september 2007.

Játaði pilturinn sakargiftir fyrir dómi  og við ákvörðun refsingar var tekið mið af því. Jafnframt var tekið mið af því að hann var einungis 18 ára gamall er upp um brot hans komst.