Eldur kom upp í fiskibátnum Sigurpáli ÞH-130 á Skjálfanda í morgun. Tveir menn voru um borð í bátnum en þeim var bjargað yfir í björgunarbát Slysavarnafélagsins Landsbjargar á Húsavík.

Stjórnstöð Landhelgisgæslunnar barst tilkynning 10:18  í gegnum Neyðarlínuna um að eldur hafi komið upp í Sigurpáli ÞH. Hafði stjórnstöðin tafarlaust samband við bátinn en tveir menn voru um borð. Þeir fengu fyrirmæli um að sjósetja björgunarbát.

Stjórnstöð hafði samband við nærstödd skip og báta sem voru beðin um að stefna á staðinn. Björgunarbátur Slysavarnafélagsins á Húsavík, Jón Kjartansson var kallaður á staðinn ásamt slökkviliði. Klukkan 10:32 tilkynnti áhöfn björgunarbátsins Jóns Kjartanssonar að áhöfn Sigurpáls væri komin um borð í björgunarbátinn heilir á húfi. Fóru slökkviliðsmenn um borð í Sigurpál og vinna nú við að slökkva eldinn.

Jón Kjartansson er nú á leið í land að sækja fleiri slökkviliðsmenn og bíða aðrir bátar og skip átekta.

Sigurpáll ÞH-130 er 26 tonna eikarbátur smíðaður á Akureyri 1972.