mbl.is/Brynjar Gauti

Eftir Guðna Einarsson gudni@mbl.is

Flugfélag Íslands (FÍ) hefur sagt upp fimmtán flugmönnum og þar af var fjórum sagt upp um nýliðin mánaðamót. Hjá félaginu starfa í vetur rúmlega sextíu flugmenn sem er heldur færra en var í fyrravetur.

„Þetta er árstíðabundin sveifla í rekstri, en hún er ef til vill heldur meiri en í fyrra,“ sagði Einar Björnsson, flugrekstrarstjóri FÍ, um uppsagnirnar. Hann sagði að samkvæmt kjarasamningi flugmanna mætti aðeins ráða flugmann sem sumarmann í eitt skipti. Næsta ár á eftir væri hann sjálfkrafa fastráðinn. Í þeim hópi sem sagt var upp hjá Flugfélaginu voru tíu fastráðnir flugmenn.

Líkt og komið hefur fram hefur Icelandair sagt upp 112 flugmönnum á árinu. Hjá félaginu munu starfa tæplega tvö hundruð flugmenn í vetur. Fyrstu uppsagnir þeirra tóku gildi í gær og var þar um sumarmenn að ræða. Flugmönnum hjá Icelandair mun fækka allt til 1. desember nk.

„Ég held að þetta sé dýpri niðursveifla en við höfum séð á undanförnum árum. Hún kemur í kjölfar mikillar uppsveiflu,“ sagði Jóhannes Bjarni Guðmundsson formaður Félags íslenskra atvinnuflugmanna (FÍA), um uppsagnir flugmanna hjá Icelandair. Hann sagði að starfsaldur þeirra sem sagt var upp hjá Icelandair hefði mestur verið 4–5 ár. Engir flugstjórar misstu vinnuna en 57 flugstjórar mundu færast í sæti flugmanna í vetur.

Jóhannes sagði litla atvinnu að hafa fyrir flugmenn hér á landi þessa dagana. „Atvinnutækifærin eru nú helst í Mið-Austurlöndum og í Asíu. Það eru fáir reiðubúnir að fara þangað, en eitthvað eru menn að skoða það,“ sagði Jóhannes. Hann sagði að JetX, sem brátt mun heita Primera Air, hefði aldrei ráðið íslenska flugmenn.