Á grundvelli undanþágulista verður fæðingarþjónusta óröskuð á fæðingardeildum. Ekki gildir það sama um mæðravernd og sónarþjónustu. mbl.is/Golli

Heimaþjónusta við nýbakaðar mæður skerðist ekki þrátt fyrir verkfall ljósmæðra þar sem þær ljósmæður sem henni sinna starfa samkvæmt verktakasamningi við Tryggingastofnun ríkisins.

Næsti samningafundur ljósmæðra við ríkið er boðaður klukkan tíu í fyrramálið og því allt útlit fyrir að boðað verkfall hefjist á miðnætti. Ljósmæður hafa verið boðaðar á fund hjá heilbrigðisnefnd Alþingis í dag og jafnframt verður fyrirhugað verkfall til umræðu í fyrirspurnartíma á Alþingi klukkan 14:00 í dag.

Hins vegar verður engin starfsemi í Hreiðrinu á Landspítalanum þar sem Ljósmæðrafélag Íslands lítur svo á að sú undanþáguheimild sem gildir samkvæmt þrettán ára gömlum undanþágulista sé ekki lengur í gildi þar sem grundvallarbreyting hefur orðið á starfsemi deildarinnar.

Samkvæmt upplýsingum frá Ljósmæðrafélaginu eru 220 félagsmenn í félaginu og sinna þeir 130 stöðugildum hjá ríkinu. Ríflega 70% þeirra  taka þátt í verkfallinu sem hefst á miðnætti. 

Fyrsta verkfallið hefur verið boðað á miðnætti í kvöld og stendur í tvo sólarhringa. Annað verkfallið hefur verið boðað frá miðnætti 11. september og stendur það einnig í tvo sólarhringa. Þriðja verkfallið hefst á miðnætti 17. september og lýkur þremur sólarhringum síðar. Fjórða verkfallið verður frá miðnætti 23. september og stendur í fjóra sólarhringa. Síðan er boðað verkfall frá og með 29. september.