Jarðvegsframkvæmdir standa yfir á álverslóðinni í Helguvík. mbl.is/RAX

Úrskurðarnefnd skipulags- og byggingarmála hefur hafnað kröfu Náttúruverndarsamtaka Íslands að stöðva til bráðabirgða framkvæmdir, sem hafnar eru á lóð Norðuráls í Helguvík.

Náttúruverndarsamtökin kærðu þá ákvörðun sveitarstjórnar Garðs og bæjarráðs Reykjanesbæjar frá því í byrjun júlí um að veita leyfi til byggingar álvers og tengdra mannvirkja í Helguvík á Reykjanesi. Þá kröfðust samtökin þess, að framkvæmdir á lóðinni yrðu stöðvaðar til bráðabirgða á meðan kæran er til meðferðar hjá nefndinni. 

Úrskurðarnefndin segir að framkvæmdir samkvæmt byggingarleyfinu séu fyrst og fremst jarðvegsframkvæmdir og svo muni verða enn um sinn. Sé ekki fyrirsjáanlegt að varanlegar og óafturtækar framkvæmdir muni eiga sér stað meðan málið er til meðferðar fyrir úrskurðarnefndinni.  Yfirstandandi framkvæmdir séu, að dómi úrskurðarnefndarinnar, ekki til þess fallnar að raska réttarstöðu aðila með þeim hætti að haft geti áhrif á efnisúrlausn málsins.