Þreifingar til að leita sátta hafa átt sér stað milli Orkuveitu Reykjavíkur (OR) og Hafnarfjarðar vegna kaupa OR á hlut bæjarins í Hitaveitu Suðurnesja (HS). Hafnfirðingar krefjast þess að OR standi við gerðan samning og greiði bænum 7,7 milljarða króna auk dráttarvaxta fyrir 14,65 prósenta hlut bæjarins í HS.

Deilan rataði í síðustu viku fyrir Héraðsdóm Reykjavíkur þar sem dómari hvatti aðila málsins til að reyna til þrautar að leita sátta.

Þreifingar en ekkert formlegt

Að sögn Guðlaugs Gylfa Sverrissonar, nýs stjórnarformanns OR, eru þreifingar komnar í gang en ekki formlegar viðræður. Aðspurður hvort breyttar áherslur muni fylgja nýjum stjórnarformanni í afgreiðslu þessa máls segir hann að það eina sem muni breytast sé að reynt verði að klára málið. „Hafnfirðingar hafa sýnt að þeir eru ábyrgir aðilar rétt eins og við. Auðvitað vona ég að við náum að leysa þetta og stjórnin öll mun einhenda sér í það að ljúka málinu þannig að allir séu sáttir. Það þarf að klára þetta mál og við erum opnir fyrir því að koma að því eins og hægt er.“

Stefán Geir Þórisson, lögmaður Hafnarfjarðarbæjar, vildi ekki tjá sig um hvort sáttarumleitanir hefðu átt sér stað milli deiluaðila.