Eins og sést á þessari mynd eru kartöflunar mjög stórar, en eldspýtustokkur stendur ofan á kartöflunni svo menn átti sig á stærðinni. mynd/Haraldur Stefánsson

Þær voru ansi myndarlegar og stórar kartöflurnar sem hjónin Erla Ingimarsdóttir og Haraldur Stefánsson tóku upp í sumarbústaðalandi sínu í Biskupstungum í morgun. „Ég veit ekki hvað við fengum mörg kíló upp úr þessu litla beði,“ sagði Erla í samtali við mbl.is.

„Við settum þarna örfáar kartöflur í sumarbústaðalandið hjá okkur í vor. Og við ætluðum bara að hafa þetta lítið núna. Svo hefur maður ekkert skipt sér af þessu,“ segir Erla og bætir við að þau hjónin hafi loks ákveðið að kíkja á uppskeruna í nú í morgun. „Og það var alveg þvílíkt. Þetta eru engar smástærðir,“ segir hún og bætir við að þau hafi aldrei séð annað eins. 

Aðspurð segist Erla hafa ræktað kartöflur lengi. „Við höfum gert þetta af og til okkar hjúskaparár,“ segir hún, en þau hjónin hafa verið gift í um 50 ár.

Erla sést hér með uppskeruna, sem verður deilt á milli vina og vandamanna. mynd/Haraldur Stefánsson