Guðjón Arnar Kristjánsson, formaður Frjálslynda flokksins. Ásdís Ásgeirsdóttir

 
Guðjón Arnar Kristjánsson, formaður Frjálslynda flokksins, hefur sent Mannréttindanefnd Sameinuðu þjóðanna bréf þar sem hann kynnir og ítrekar afstöðu flokksins vegna niðurstöðu nefndarinnar varðandi fiskveiðistjórnunarkerfið á Íslandi. 

Í bréfinu segir m.a., að skoðanakannanir hafi sýnt það í meir en 15 ár, að mikill meiri hluti íslensku þjóðarinnar sé á móti núverandi kvótakerfi. Sá þjóðarvilji hafi ekki náð fram að ganga í breyttri lagasetningu vegna þess að hagsmunaöflin í sjávarútvegi og stærsta stjórnmálaflokki þjóðarinnar hafi verið svo sterk.
 
Í ríkisstjórn Íslands sitja í dag tveir flokkar. Sjálfstæðisflokkurinn hafi barist fyrir fiskveiðistjórnunarkefinu en Samfylkingin verið á móti því áður en flokkurinn fór í samsteypustjórn með Sjálfstæðisflokknum. Við umræður á Alþingi hafi allir talsmenn flokka stjórnarandstöðunnar lýst því yfir að nauðsynlegt sé að breyta kerfinu þannig að það samræmist mannréttindum. Þess vegna megi ætla, að meiri hluti þingmanna sé fylgjandi breytingum þó sá þingvilji nái ekki fram að ganga vegna þess að stjórnarsáttmáli Samfylkingar og Sjálfstæðisflokks taki fyrir róttækar breytingar á kerfinu.
 
Frjálslyndi flokkurinn segist telja, að fara eigi eftir áliti Mannréttindanefndar SÞ  og breyta fiskveiðistjórnunarkerfinu þannig að það sé í samræmi við mannréttindi. Einnig beri að greiða þeim aðilum bætur sem orðið hafi fyrir tjóni af völdum kerfisins.

„Ríkisstjórnin hefur ekki brugðist við áliti mannréttindanefndar Sameinuðu þjóðarinnar. Þingflokkur Frjálslynda flokksins mótmælir því og harmar að ríkisstjórnin bregðist ekki við og taki að öllu leyti tillit til álits mannréttindanefndar Sameinuðu þjóðanna í þessu máli.  Svar ríkisstjórnarinnar til mannréttindanefndar Sameinuðu þjóðanna frá 9.6. 2008 er að mati Frjálslynda flokksins ómerkilegt yfirklór yfir aðgerðarleysi í málinu og aumkunarverð afsökun á því að íslenska ríkisstjórnin hvorki hefur né ætlar að bregðast við áliti Mannréttindanefndar Sameinuðu þjóðanna með þeim hætti sem álit mannréttindanefndarinnar Sameinuðu þjóðanna frá 24. október 2007 kveður á um í ofangreindu máli,“ segir í tilkynningu frá flokknum.