Árásum á lögreglumenn hefur fjölgað mikið. mbl.is

eftir Rúnar Pálmason runarp@mbl.is

Brotum gegn lögreglumönnum hefur fjölgað nokkuð á undanförnum árum og segir Snorri Magnússon, formaður Landssambands lögreglumanna (LL), að það sé mat lögreglumanna að ofbeldið hafi orðið grófara og árásirnar hættulegri. Hann vill að lögreglumenn fái aukna þjálfun í sjálfsvörn eftir að lögregluskóla lýkur og að Útlendingastofnun vísi fleiri útlendingum sem brotið hafa af sér af landi brott.

Á undanförnum árum hefur töluvert verið fjallað um aukið ofbeldi gegn lögreglumönnum og sú umræða var meginástæða þess að Björn Bjarnason dómsmálaráðherra lagði til árið 2006 að refsingar við ofbeldi gegn lögreglumönnum og öðrum stéttum sem geta þurft að beita valdi í störfum sínum yrðu hertar – úr sex ára hámarksrefsingu í átta ára fangelsi.

Ráðherrann tók jafnframt fram að sér þætti sem mikið hefði skort á að dómstólar hefðu litið árásir á lögreglumenn nægilega alvarlegum augum. Björn kvaðst jafnframt vonast til að hertar refsingar hefðu varnaðaráhrif.