Senn líður að þeim tíma þegar árleg inflúensubólusetning hefst, en miðað hefur verið við októberbyrjun. Haraldur Briem sóttvarnalæknir gerir ráð fyrir að bóluefni verði komið til landsins í lok september og heilbrigðisstofnanir geti pantað bóluefni hjá dreifingaraðila nú þegar.

Sóttvarnalæknir mælist til þess að eftirtaldir áhættuhópar njóti forgangs við inflúensubólusetningar:

Allir einstaklingar 60 ára og eldri.

Öll börn og fullorðnir sem þjást af langvinnum hjarta-, lungna-, nýrna- og lifrarsjúkdómum, sykursýki, illkynja sjúkdómum og öðrum ónæmisbælandi sjúkdómum. Heilbrigðisstarfsmenn sem annast einstaklinga í áhættuhópum sem taldir eru upp hér að ofan. Í ágústlok greindist eitt tilfelli inflúensu af B stofni hér á landi. Ekki er hægt að fullyrða að þetta þýði að inflúensan sé snemma á ferðinni í ár.