„Ég vaknaði einn morguninn í hláturskasti, en í draumi um nóttina var ég að borða inni á veitingastað sem hét Hungry and the Burger,“ segir tónlistarmaðurinn Árni Rúnar Hlöðversson, einnig þekktur sem Árni plús 1, en hans fyrsta sólóplata, Lettuce and Tomato, er einmitt gefin út undir nafni draumaveitingastaðarins.

Platan, sem er tekin upp í Brooklyn hverfinu í New York, er einskonar Dogma-plata, þar sem aðeins voru notuð þau hljóðfæri sem voru við höndina hverju sinni. „Þetta er svona draumkennd og flæðandi tónlist, gerð við frumstæð skilyrði, sem var hálfgert tilraunaverkefni,“ útskýrir Árni en til dæmis var eitt lagið, Antant, tekið upp þegar gesti bar að garði, vopnaða bassa og melódíku.

Árni mun fagna útgáfu þessarar fyrstu sólóplötu sinnar á Kaffibarnum næstkomandi laugardagskvöld, en þar nýtur hann dyggrar aðstoðar hljómsveitarinnar Reykjavíkur! og stuðbandsins Terrordisco, sem mun spila plötu Árna.