Eftir Andra Karl andri@mbl.is

Rúm tvö ár eru síðan lög um eftirlit með aðgangi barna að kvikmyndum og tölvuleikjum voru samþykkt á Alþingi. Í þeim segir að meta eigi allar kvikmyndir og tölvuleiki sem ætlaðir eru til sýningar, sölu eða annarrar dreifingar hér á landi. Sama gildir um ítarefni sem dreift er með kvikmyndum og tölvuleikjum en einnig kynningarefni.

Reglulega berast umboðsmanni barna athugasemdir vegna kynningarmynda í bíóhúsum þar sem foreldrar átelja að auglýstar séu kvikmyndir sem ekki eru við hæfi barna, og það á kvikmyndarsýningu sem leyfð er öllum aldurshópum.

SMÁÍS hefur það hlutverk að skoða efnið og segist Snæbjörn Steingrímsson, framkvæmdastjóri samtakanna, þekkja þetta vandamál. Það sé hins vegar aðeins flóknara en svo, þar sem lögum samkvæmt eru kynningarmyndböndin flest hæf til sýningar fyrir alla aldurshópa, og þó svo að kvikmyndin sjálf sé það ekki. Snæbjörn tekur þó fram að því hafi verið beint til kvikmyndahúsa að taka tillit til þess hvaða kynningarmyndir eru sýndar, s.s. í samræmi við þá mynd sem er í sýningu.

Snæbjörn segir það sannarlega hafa verið þrautagöngu að koma gagnagrunninum upp, en loksins sjái fyrir endann á henni. Ráðgert er að gagnagrunnurinn og skoðunarkerfið, sem jafnframt er hollenskt, verði komin upp eftir rúman mánuð.

Þegar gagnagrunnurinn er kominn upp verður auðvelt fyrir foreldra að fletta upp kvikmyndum – og tölvuleikjum – og sjá hvort þær eru við hæfi barna þeirra. Einnig mun þar fylgja rökstuðningur matsmanna.