Frá húsleitinni í morgun Víkurfréttir

Við húsleit á sjö dvalarstaði hælisleitenda í Reykjanesbæ í morgun lagði lögreglan hald á vegabréf, önnur persónuskilríki, ýmis skjöl og reiðufé í ýmsum gjaldmiðli að andvirði rúmlega 1,6 milljóna króna. Alls tóku 58 lögregluþjónar frá þremur embættum þátt í aðgerðunum í morgun.

Lögreglumenn frá lögreglustjóranum á Suðurnesjum, lögreglustjóranum á höfuðborgarsvæðinu og frá Ríkislögreglustjóra tóku þátt í húsleit á 7 dvalarstöðum hælisleitenda í Reykjanesbæ í morgun en aðgerðirnar hófust klukkan 7:30. Voru húsleitirnar sameiginlegt verkefni lögregluembættanna þriggja auk Útlendingastofnunar og höfðu verið vandlega undirbúnar og framkvæmdar á grundvelli fyrirliggjandi dómsúrskurða frá Héraðsdómi Reykjaness.

Meginmarkmið húsleitanna var að leita persónuskilríkja og annarra gagna til að bera kennsl á hælisleitendur en lögregla hefur rökstuddan grun um að hælisleitendur komi slíkum gögnum undan og framvísi þeim ekki við yfirvöld meðan á hælismeðferð stendur.

Segir í tilkynningu frá lögreglu að húsleitirnar hafi verið mjög árangursríkar og gekk framkvæmd þeirra vel í alla staði. Þau gögn sem lögregla lagði hald á muni gera Útlendingastofnun kleift að hraða úrlausn fjölda þeirra mála sem stofnunin hafi til meðferðar og taka ákvarðanir á réttum forsendum. Verulegur fjárhagslegur ávinningur sé af því að hraða meðferð hælismála hjá Útlendingastofnun.

Húsleitum lögreglu lauk um kl. 09:15.

Fyrir utan gistiheimilið í morgun Víkurfréttir

Lögreglan að störfum í Reykjanesbæ Víkurfréttir