Brynjar Gauti

Eigendur þeirra vefsíðna, sem selja þjónustu tengdri farsímum og uppfylltu ekki  lagaskilyrði, hafa allir brugðist við tilmælum Neytendastofu og eru vefsíðurnar nú í samræmi við ákvæði laganna.

Neytendastofa gerði athugun í júní, sem sneri að sölu þjónustu tengdri farsímum á netinu, þ.e. hringitónum o.þ.h. Athugunin var hluti af samræmdum aðgerðum stjórnvalda á Evrópska efnahagssvæðinu um neytendavernd. Þegar sameiginlegar niðurstöður aðgerðarinnar voru kynntar kom í ljós að 80% þeirra vefsíðna sem kannaðar voru uppfylltu ekki öll skilyrði neytendalaga og þörfnuðust nánari athugunar.

Átta íslenskar vefsíður, sem bjóða þjónustu tengda farsímum, voru athugaðar af Neytendastofu. Aðeins ein vefsíðan var í samræmi við ákvæði laga um óréttmæta viðskiptahætti,  rafræn viðskipti og þjónustu  og laga um húsgöngu- og fjarsölusamninga. Á hinum sjö vefsíðunum  skorti einhverjar upplýsingar um seljanda, s.s. nafn, heimilisfang eða kennitölu.

Í framhaldi af athuguninni sendi Neytendastofa eigendum þeirra vefsíðna sem uppfylltu ekki skilyrði laganna bréf, þar sem gerðar voru athugasemdir við vefsíðurnar og óskað eftir að upplýsingar á síðunni yrðu lagfærðar. Eigendur vefsíðnanna brugðust allir við tilmælum Neytendastofu og því mun ekki vera þörf á frekari aðgerðum Neytendastofu.