mbl.is / Kjartan Þorbjörnsson

Atvinnulausir sem hyggjast fara utan í atvinnuleit geta fengið greiddar atvinnuleysisbætur í allt að þrjá mánuði í ríkjum innan Evrópska efnahagssvæðisins, EES, hafi þeir verið atvinnulausir í samfellt fjórar vikur fyrir brottför.

Frá því að Ísland gerðist aðili að EES 1994 hefur Vinnumálastofnun gefið út slík vottorð til 1752 einstaklinga, ekki bara til Íslendinga heldur einnig útlendinga sem áunnið hafa sér bætur hér. Til landsins hafa hins vegar komið 654 með slík vottorð á tímabilinu.

„Þetta er hluti af því sem heitir frjálst flæði milli landa og liggur einfaldlega í því að fólk sem er atvinnulaust geti farið til annars lands eftir að það er búið að reyna fyrir sér heima í 4 vikur. Ríkið sem viðkomandi leitar að atvinnu í greiðir bæturnar en rukkar svo heimalandið um þær,“ greinir Jóngeir Hlinason, deildarstjóri hjá Vinnumálastofnun, frá og tekur um leið fram að upphæðin sé sú sem viðkomandi átti rétt á í heimalandinu. „Þetta heitir nefnilega að halda bótum sínum,“ útskýrir hann.

Jóngeir segir að stór hluti Íslendinga sem fari utan í atvinnuleit fari til Norðurlandanna og flestir til Danmerkur. „Langflestir sem koma hingað koma jafnframt frá Danmörku og eru íslenskir námsmenn eða fyrrverandi námsmenn, stærsti hlutinn. Með því að ganga í svokallaðan A-kassa á síðasta námsárinu geta þeir fengið lágmarksbætur að loknu náminu í Danmörku og þetta hafa Íslendingar notfært sér þannig að þeir geta fengið greiddar danskar bætur í allt að 3 mánuði eftir að þeir koma heim.“