Formenn félaga lögreglumanna utan höfuðborgarsvæðisins hafa ályktað um fjarskiptamiðstöðina. mbl.is/Júlíus

Yfirlýsing formanna svæðisdeilda Landssambands lögreglumanna, staðsettum utan höfuðborgarsvæðisins er svohljóðandi:

„Í kjölfar fjölmiðlaumræðu nú sl. daga þá hafa skapast miklar umræður innan raða lögreglumanna um hvort og þá hvaða verkefni eigi að vera inni á borði embættis ríkislögreglustjóra til  daglegrar stjórnunar. 

Undanfarin ár hefur verið unnið hörðum höndum að því að efla og bæta fjarskiptakerfi lögreglunnar. Síðan TETRA kerfið var innleitt hefur Fjarskiptamiðstöð ríkislögreglustjóra gegnt því hlutverki að vera samhæfingaraðili í aðgerðum lögreglu, tekið á móti símtölum frá Neyðarlínu til úrlausnar fyrir lögreglu sem og þjónustað lögreglumenn um allt land, s.s. við miðlun upplýsinga.

Mörg lögregluembætta landsins hafa í kjölfarið breytt sínum starfsreglum og í auknum mæli séð sér fært um að loka lögreglustöðvum og þar með fjölga útivinnandi lögreglumönnum, ef á þarf að halda.  Aðgengi að þjónustu og upplýsingum er að hafa í gegnum fjarskipti við fjarskiptamiðstöðina í Skógarhlíðinni þar sem starfa menn sem eru sérhæfðir í miðlun upplýsinga úr upplýsingakerfum lögreglu.

Nú vill Stefán Eiríksson, lögreglustjóri höfuðborgarsvæðisins, fá til sín starfsemi Fjarskiptamiðstöðvar ríkislögreglustjóra með manni og mús.  Sú uppbygging sem verið hefur í þessum málum er á réttri leið og því væri það mikil afturför að fara í flutning á þessari starfsemi með þeim hætti sem Stefán sér fyrir sér.   Sannarlega getur menn greint á um hvaða starfsemi eigi að vera í umsjá embættis ríkislögreglustjóra en þessi samhæfingarstarfsemi á heima þar, það er ekki spurning.

Sú sýn sem hefur verið kynnt að í kjölfar þess að færa þessa starfsemi yfir til lögreglu höfuðborgarsvæðisins myndi samstarf við Neyðarlínuna verða eflt og starfsmenn hennar settir í þá stöðu að miðla verkefnum til lögreglumanna úti á götunni, það er að sama skapi ekki sú sýn sem við viljum sjá.  Þjónusta fjarskiptamiðstöðvar við lögreglumenn á vettvangi er nauðsynlegur þáttur í starfsemi embætta á landsbyggðinni hvað varðar aðgengi að upplýsingum úr lögreglukerfum sem er lykilþáttur í skilvirkri löggæslu.

Við erum sannfærð um að starfsemi fjarskiptamiðstöðvar sem þjónustar allt landið á heima hjá embætti ríkislögreglustjóra og að þar verði haldið áfram á þeirri braut sem mörkuð hefur verið. Að þar starfi fagmenn sem miðla verkefnum og upplýsingum til samstarfsmanna sinna um land allt og samhæfa aðgerðir þegar þess þarf.  Fjarskiptamiðstöð ríkislögreglustjóra, eins og hún er starfrækt í dag, er einn af lykilþáttum í þeirri þróun að efla lögregluna í heild og skapa þannig meira öryggi í samfélaginu.“

Undir yfirlýsinguna skrifa fyrir hönd svæðisdeilda Landssambands lögreglumanna utan höfuðborgarsvæðisins:

Lögreglufélag Akraness                                    -                              Jónas H. Ottósson

Lögreglufélag Vesturlands                               -                              Guðmundur H. Jónsson

Lögreglufélag Vestfjarða                                 -                              Gylfi Þór Gíslason

Lögreglufélag Norðurlands vestra                  -                              Höskuldur B. Erlingsson

Lögreglufélag Eyjafjarðar                               -                              Hermann Karlsson

Lögreglufélag Þingeyinga                                 -                              Aðalsteinn Júlíusson

Lögreglufélag Austurlands                               -                              Óskar Þór Guðmundsson

Lögreglufélag Suðurlands                                -                              Tinna Jóhönnudóttir

Lögreglufélag Vestmannaeyja                        -                              Tryggvi Kr. Ólafsson

Lögreglufélag Suðurnesja                                -                              Vignir Elísson