„Ég sendi þeim mjög kurteislega ábendingu um að þetta væri kannski ekki alveg rétt á vefnum. Ég fékk mjög kurteislegt þakkarbréf en svo hafa þeir ekkert gert við það,“ segir sr. Þórhallur Heimisson en hann reyndi, án árangurs, að benda forsætisráðuneytinu á þá pínlegu staðreynd að á vef ráðuneytisins er ekki greint alveg rétt frá uppruna íslenska skjaldarmerkisins.

Á vef ráðuneytisins er uppruni skjaldarmerkisins, nánar tiltekið landvættanna, rakinn til Heimskringlu en Þórhallur segir að upprunann sé að finna mun fyrr. „Beint kemur þetta úr opinberunarbókinni. Þetta eru ævagömul tákn,“ segir hann og bætir við að þessi tákn, landvættirnar, sé hægt að rekja enn lengra aftur, allt til Babýlon og Súmeranna, 2-3000 árum fyrir Krist.

Eins og sjá má þá hefur Þórhallur býsna yfirgripsmikla þekkingu á hvers konar táknum og hann hyggst miðla af þekkingu sinni til áhugasamra á þriðja fræðslunámskeiði haustsins hjá Fullorðinsfræðslu Hafnarfjarðarkirkju en þar verður umfjöllunarefnið kristin táknfræði og talnaspeki.

„Ég er búinn að taka saman fullt af kristnum táknum, sem eru allt í kringum okkur og fólk er búið að gleyma hvað þau þýða. Svo ætla ég líka að taka fyrir önnur tákn, sem eru trúarleg en ekki endilega kristin eins og til dæmis hakakrossinn,“ segir Þórhallur. Aðgangur á námskeiðið, sem fer fram í safnaðarheimili Hafnarfjarðarkirkju, er ókeypis og öllum opinn.