mbl.is/Július

Karlmaður á fertugsaldri hefur viðurkennt að hafa ekið bifreið sem ók aftan á annan bíl á Akrafjallsvegi og stungið af laust eftir miðnætti í nótt. Bifreiðin sem ekið var á valt. Fjórir voru í bifreiðinni sem ekið var á brott. Þeir voru allir handteknir skömmu síðar.

Fjórmenningar neituðu í fyrstu að kannast við málið, og enginn vildi viðurkenna að hafa ekið bifreiðinni. Allir mennirnir voru undir áhrifum áfengis. Svo fór að einn þeirra viðurkenndi loks sök.

Báðir bílarnir skemmdust mikið í árekstrinum sem var mjög harður. Enginn slasaðist alvarlega, en ökumaðurinn sem stakk af hlaut áverka á rifbeini.

Að sögn lögreglunnar á Akranesi er rannsókn lögreglunnar nú lokið og hefur mönnunum verið sleppt úr haldi. Ökumaðurinn má búast við því að verða sviptur ökuréttindum og greiða háa fjársekt.