Dregið hefur úr einelti um allt að 70% í þeim skólum sem hafa innleitt Olweusaráætlunina, að sögn Þorláks H. Helgasonar, framkvæmdastjóra verkefnisins, sem ætlað er að vinna gegn einelti og andfélagslegri hegðun. Um 90 skólar á Íslandi hafa innleitt áætlunina sem nær til um 60% grunnskólanemenda landsins.

Ungur maður sem ritaði grein í sunnudagsblað Morgunblaðsins um afleiðingar eineltis sem hann varð fyrir um langa hríð sagði í niðurlagi hennar að löngu ætti að vera búið að innleiða þessa áætlun í alla skóla landsins.

Áætlunin byggist á því að allir starfsmenn skólans, nemendur og foreldrar vinni saman að því að koma í veg fyrir einelti innan skólans. Þannig gegnumsýrir verkefnið allt skólastarfið. „Stundum segi ég að áætlunin sé 95% forvörn og 5% að takast á við það sem kemur upp.

Komi hins vegar eitthvað upp, hvort sem það er grunur eða einelti, er ákveðinn lyfseðill sem menn fara eftir,“ segir Þorlákur.