Áhrif kaupa ríkissjóðs á 75% hlut Glitnis komu bersýnilega fram á mörkuðum í gær. Gengisvísitalan náði nýjum og óþekktum hæðum þegar hún fór í tæp 197 stig og gengisvísitalan féll í tæp 3396 stig eða um tæp 17% sem er mesta fall hennar á einum degi frá upphafi. Evran fór í rúmar 145 krónur og danska krónan í tæpar 20 krónur og hefur krónan aldrei verið eins veik gagnvart þessum gjaldmiðlum. Á sama tíma og fall var á hlutabréfum á Íslandi styrktust helstu hlutabréfavísitölur í Evrópu og á Wall Street.

Kaupin á Glitni ástæðan

Fallið á markaðnum hér heima má rekja beint til kaupa ríkissjóðs í Glitni en ríkissjóður keypti 75% hlutafjárins á 84 milljarða króna eða á genginu 1,9. Við lokun markaðar í gær stóð gengi hlutabréfa í bankanum í 4,55 sem þýðir að selji ríkissjóður bréfin á því gengi mun hann hagnast um tæpa 120 milljarða króna.

Geta þeir selt Glitni?

Margir í fjármálaheiminum telja hins vegar að erfitt verði fyrir ríkissjóð að selja hlut sinn í bankanum og benda máli sínu til stuðnings á að matsfyrirtækið Fitch Ratings hafi lækkað lánshæfiseinkunnir ríkissjóðs fyrir langtímaskuldbindingar og sett lánshæfiseinkunnirnar á neikvæðar horfur. Þar með ríki í raun alger óvissa um framtíðarhorfur á markaði.