mbl.is/Júlíus

Lögreglan á höfuðborgarsvæðinu leitar af tveimur mönnum í tengslum við grófa líkamsárás og rán sem átti sér stað á Laugavegi um klukkan 3:30 í nótt. Mennirnir eru aldrinum 25-30 ára og eru hugsanlega  af erlendu bergi brotnir. 

Maður á sjötugsaldri var þá leiddur af tveimur mönnum inn í húsasund skammt frá gatnamótum Laugarvegar og Frakkastígs, þar sem hann var barinn og rændu. Sá sem fyrir árásinni varð var fluttur á slysadeild. Hann er ekki í lífshættu en gengst enn undir rannsóknir og er að sögn vakthafandi læknis með talsverða áverka í andliti.

Annar árásarmannanna var með ljósbláa húfu, í ljósum leðurjakka með hvitum röndum þvert yfir brjóstkassa. Hinn var í dökkum jakka og með dökka prjónahúfu, hugsanlega í ljósum gallabuxum.

Ef einhver getur veitt upplýsingar  um menn sem koma heim og saman við þessa lýsingu eru þeir beðnir að hringja í síma 444 1100.