Myndir af mönnunum tveimur náðust á öryggismyndavélar.

Lögreglan á höfuðborgarsvæðinu leitar enn tveggja manna sem eru grunaðir um rán og líkamsárás á Laugavegi um hálffjögurleytið aðfaranótt sunnudags. Þá var karlmaður á sjötugsaldri barinn og rændur en árásarmennirnir eru taldir vera á aldrinum 25-30 ára og af erlendu bergi brotnir.

Síðar sömu nótt var tösku rænt af konu á þrítugsaldri sem var á gangi við Hverfisgötu. Þar var sömuleiðis um tvo menn að ræða en ekki er vitað hvort þeir eru hinir sömu og höfðu fjármuni af manninum, sem ráðist var á á Laugavegi.

Fyrr í dag var karlmaður handtekinn í tengslum við rannsókn þessara mála en honum hefur nú verið sleppt úr haldi en sýnt þykir að hann hafi ekki átt hlut að máli.