Íslendingar, sem er í heimsókn í Álaborg í Danmörku, var stunginn í bakið með hnífi utan við hótel í miðbænum. Að sögn danskra fjölmiðla virðist árásin hafa verið tilefnislaus. Íslendingurinn mun ekki vera í lífshættu.

Að sögn Ekstra-Bladet var Íslendingurinn, sem er 27 ára, á gangi  með tveimur öðrum Íslendingum í miðbænum en hann var að heimsækja vin sinn sem býr í borginni. Um klukkan 3:30 var bíl ekið framhjá þeim og út úr bílnum stukku tveir menn og réðust á Íslendingana.  Hefur blaðið eftir lögreglu, að einn Íslendingurinn hafi verið stunginn í bakið en annar hafi verið sleginn í andlitið.

Eftir árásina flýðu árásarmennirnir í bílnum. Er öðrum lýst þannig, að hann hafi virst vera af öðru þjóðerni en dönsku og hinn leit út fyrir að vera í mótorhjólagengi. 

Engin vitni voru að þessu en lögreglan mun skoða myndir úr eftirlitsvélum í von um að þær hafi náð myndum af árásinni.