Vond staða íslensku bankanna kom starfsfólki þeirra jafn mikið á óvart og öllum öðrum, segir Anna Karen Hauksdóttir formaður Starfsmannafélags Glitnis. Hún segir að starfsfólk bankans hafi búið við mikla óvissu, það hafi óttast um störf sín og átt allt sparifé sitt í bankanum.  Ljóst sé að einhverjir muni missa vinnuna vegna ástandsins þrátt fyrir fullyrðingar um annað. Það sé einfaldlega óhjákvæmilegt.

Stjórnendur og starfsfólk Glitnis hittist í upphafi vinnudags í morgun til að ræða þær breytingar sem hafa orðið eftir að Fjármálaeftirlitið tók við bankanum í krafti nýrra laga. Sömu stjórnendur verða áfram í bankanum og starfsfólk var fullvissað um að það héldi störfum sínum á óbreyttum kjörum. Már Másson forstöðumaður Upplýsingasviðs bankans sagði að ekki hefði verið rætt um hvort forstjóri og stjórnendur héldu ofurlaunum sínum en nú væri það stjórnvalda að svara slíkum spurningum. Hann vildi ekki svara því hvort stjórnendur tækju frumkvæði að slíkum breytingum.