Gríðarlegur fjöldi íslenskra starfsmanna Glitnis og Landsbankans í Lúxemburg hafa haft samband við Samtök starfsmanna fjármálafyrirtækja (SSF) og óskað eftir aðstoð stéttarfélagsins vegna stöðu fyrirtækjanna. Bæði Glitnir og Landsbankinn í Lúxemburg voru í gær settir í greiðslustöðvun og starfsemi þeirra stöðvuð.

Friðbert Traustason, framkvæmdastjóri SSF, segir að félagsmenn fyrirtækisins séu mjög áhyggjufullir. „Sumir sem hafa haft samband við okkur hafa hreinlega verið í öngum sínum. Við munum gera allt sem í okkar valdi stendur til að veita okkar fólki alla þá aðstoð sem þörf verður á.“ Þegar er hafin vinna við að veita félagsmönnum lögfræðiaðstoð og jafnframt verður fólki boðinn sálfræðistuðningur.

Fjórir milljarðar tryggir

Samtök starfsmanna fjármálafyrirtækja eiga um einn milljarð króna í sjóðum hér á landi. Friðbert segir að þeir verði nýttir í botn til að veita fólki aðstoð. „Þessir sjóðir verða bara tæmdir ef þörf krefur. Við höfum jafnframt aðgang að sjóðum norrænna systursamtaka og í þeim eru um 30 milljarðar króna. Af þeim eigum við skilyrðislausan aðgang að tíu prósentum eða um þremur milljörðum. Auk þess höfum við vilyrði fyrir því að okkur verði veitt öll sú fjárhagslega aðstoð sem hægt verður að veita. Þessir fjármunir verða nýttir til að aðstoða okkar fólk með öllum ráðum.“

Allar reglur beygðar

Friðbert segir að einhver dæmi séu um að íslenskir starfsmenn bankanna erlendis hafi ekki haldið áfram sem félagar í SSF. „Ég vil taka af öll tvímæli um það að þrátt fyrir að fólk hafi af einhverjum ástæðum ekki greitt til SSF þá mun það fólk líka fá alla aðstoð sem við getum veitt, fjárhagslegan stuðning jafnt sem lögfræðilegan og andlegan. Allar reglur verða beygðar til að hjálpa okkar fólki við þessar aðstæður.“