Heildareignir lífeyrissjóðanna munu dragast saman um tugi milljarða króna vegna erfiðleika íslensku bankanna. Þrír lífeyrissjóðir: Lífeyrissjóður Bankastræti 7, Gildi – lífeyrissjóður og Lífeyrissjóður verslunarmanna áttu stóra hluti í öllum bönkunum þremur.

Alls áttu íslenskir lífeyrissjóðir 170 milljarða króna í innlendum hlutabréfum um mitt þetta ár og 171 milljarð króna í innlendum skuldabréfa- og verðbréfasjóðum. Ekki liggur enn fyrir hvort þrotabú þeirra banka sem ríkið hefur tekið yfir taki við kröfum vegna þessa.

Tap sjóðanna verulegt áfall

„Ég get ekki svarað fyrir einstaka sjóði en auðvitað er þetta verulega mikið áfall að sjóðirnir verði fyrir þessum töpum.“ Í lok september voru áðurnefndir þrír sjóðir á meðal átta stærstu eigenda í Kaupþingi með samtals 9,4 prósent hlut sem á síðasta skráða gengi bankans er metinn á tæpa 46 milljarða króna. Kaupþing í Bretlandi var í gær sett í greiðslustöðvun og mikil óvissa ríkir um framtíð bankans.

Exista á um 25 prósent í Kaupþingi. Á meðal stærstu eigenda í Exista eru þrír lífeyrissjóðir með samtals um 9,6 prósent eignarhlut. Markaðsvirði hans á mánudag var um 6,3 milljarðar króna. 24 stundir greindu frá því í gær að eiginfjárhlutfall Exista væri orðið neikvætt og félagið því tæknilega gjaldþrota.

Í 24 stundum í gær var einnig sagt að þrír lífeyrissjóðir ættu samtals 6,33 prósent í Landsbankanum. Það miðaðist við stöðuna í lok ágúst. Á síðasta birta lista yfir eigendur bankans áttu þessir þrír lífeyrissjóðir alls 4,74 prósent hlut í bankanum að andvirði rúmlega 10 milljarða króna. Samkvæmt upplýsingum frá Lífeyrissjóði verslunarmanna hafði sjóðurinn þó minnkað eign sína í bankanum enn frekar og stóð hún í um 1,4 prósenti. Þá áttu tveir lífeyrissjóðir um 3,3 prósent í Glitni sem var metin á um 492 milljónir króna fyrir aðkomu ríkisins að Glitni.