Golli / Kjartan Þorbjörnsson

Eftir Sigtrygg Sigtryggsson sisi@mbl.is

Að sögn Ásgeirs Friðgeirssonar, talsmanns Björgólfs Guðmundssonar, er safnið á sínum stað í bankanum. Safnið sé nú í raun í umsjá skilanefndar, sem Fjármálaeftirlitið skipaði til að taka bankann yfir. „Málverkasafnið er eign bankans en ekki einkasafn. Það hefur aldrei verið eignfært enda talið mjög erfitt að meta það til fjár,“ segir Ásgeir.

Aðalsteinn Ingólfsson listfræðingur hefur verið listrænn ráðunautur Landsbankans hin seinni ár. Hann segir að eignadeild Landsbankans hafi haldið utan um safnið, annast varðveislu þess og lán á verkum.

Að sögn Aðalsteins eru nú um 1.700 myndverk í safninu. Þegar bankinn var einkavæddur voru myndverkin um 1.300 talsins. Síðan bankinn var einkavæddur hefur markvisst verið bætt við safnið með kaupum á verkum eftir þekkta listamenn.

Aðalsteinn segir að í safninu séu mörg frábær listaverk og sum þeirra teljist með mestu perlum íslenskrar myndlistarsögu. Að því leyti sé safnið ómetanlegt. Sum verkanna frá fyrri tíð séu reyndar ekki ýkja merkileg. Þá hafi ekki verið fylgt markvissri stefnu varðandi listaverkakaup. Dæmi séu um að verk hafi verið tekin upp í skuld eða keypt fyrir greiðasemi.

Bankinn á í safni sínu verk eftir alla helstu frumkvöðla málaralistarinnar hér á landi. Til að mynda eru í safninu um 60 verk eftir Jóhannes S. Kjarval. Um er að ræða nokkur af bestu olíumálverkum listamannsins, en einnig er þarna að finna mörg smærri verk.

Í aðalbanka Landsbankans eru nokkur naglföst verk, sem Aðalsteinn segir að séu alveg einstök í sinni röð. Nefnir hann sem dæmi verk Jóns Stefánssonar í afgreiðslusal bankans, veggmyndir Kjarvals á bankastjóraganginum og stóra mósaíkmynd Nínu Tryggvadóttur í sal, þar sem gjaldeyrir var afgreiddur fyrr á árum.