Leikskólakennarar hvetja rekstraraðila leikskóla til að tryggja að börn hafi fullan og óskertan aðgang að leikskólanámi þrátt fyrir tímabundna fjárhagslega erfiðleika. Leikskólastjórar eru hvattir til að vera á varðbergi og grípa inn í ef grunur er um að foreldrar neyðist til að segja upp leikskóladvöl sökum fjárskorts.
Þetta kemur fram í ályktun frá leikskólakennurum. Þar er því ennfremur „beint til skólastjóra og kennara í leikskólum að sjá til þess að leikskólinn sé griðastaður barna þar sem þau geta dvalið við leik og nám og notið leikskólasamfélagsins án þess að þurfa að hlusta á umræður eða verða fyrir áreiti af nokkru tagi vegna þeirra óvenjulegu aðstæðna sem blasa við í íslensku efnahagslífi.“