„Ef ekki verður tap á bréfum í innlánsstofnunum þá hef ég metið að höggið verði á bilinu fimmtán til tuttugu prósent,“ segir Benedikt Jóhannesson, tryggingastærðfræðingur hjá Talnakönnun, um áhrif yfirstandandi efnahagskreppu á heildareignir lífeyrissjóða. Greint hefur verið frá því að greiðslur lífeyris muni skerðast í upphafi næsta árs vegna rýrnunar á eignum sjóðanna en ekki liggur fyrir um hversu mikið.

Hann segir lífeyrissjóðina þó vera með margvíslega eignarliði og sem betur fer verði langflestir þeirra ekki fyrir áhrifum. „Það eru þó nokkrir stórir liðir sem gætu orðið fyrir áhrifum. Í fyrsta lagi er innlend hlutabréfaeign og eign í hlutabréfasjóðum. Þar hefur orðið mikið högg og ég held að við getum gert ráð fyrir því að þar fari um 80 prósent eigna lífeyrissjóðanna. Þar verður verulegt högg.

Varðandi skuldabréf fyrirtækja má búast við því að bréf þeirra fyrirtækja sem lenda í vandræðum núna verði fyrir höggi, þó að ekki liggi fyrir hversu mikið það verði. Stærsta óvissan er síðan um skuldabréfin sem eru útgefin af bönkunum. Menn vita enn ekki að hversu miklu leyti það verður verndað af ríkinu. Í síðasta lagi eru síðan verðbréfasjóðirnir og um þá ríkir líka mikil óvissa. Sérstaklega vegna þess að þar eru bréf ýmissa fyrirtækja sem hafa lent í hremmingum.“