Gjaldeyrisvaraforði Seðlabanka Íslands samanstendur af erlendum verðbréfum, gjaldeyri, inneignum í bönkum og öðrum eignum. Gullforði bankans er tæpra 6 milljarða virði og geymdur í Bretlandi.

Mikill gjaldeyrisskortur er hér á landi og hafa bankar sett takmarkanir á úttektir á gjaldeyri úr bönkum sínum. Þannig geta viðskiptavinir banka tekið allt að 50.000 krónur út í erlendum gjaldeyri. Fyrirtæki hafa ekki getað skipt krónum í gjaldeyri sökum þessa og nokkur dæmi eru um að fyrirtæki hafi lent í erfiðleikum með að greiða fyrir vörur sínar. Ríkisstjórnin hefur boðað aðgerðir til að sporna við þessu og hefur Seðlabanki Íslands boðið fyrirtækjum ríkari ábyrgð til að auðvelda þeim viðskipti sín.

Þegar samsetning gjaldeyrisforðans er skoðuð kemur í ljós að seðlar og inneignir í bönkum erlendis nema aðeins um þriðjungi af öllum forðanum sem í lok september var 375 milljarðar króna. Tæplega 250 milljarðar eru bundnir í erlendum verðbréfum og um 6 milljarðar í öðrum eignum, þá aðallega gulli.

Gullið í Bretlandi

Athygli vekur, nú þegar forsætisráðherra Bretlands hefur sagst vera að íhuga málsókn á hendur íslenska ríkinu, að gullforði Seðlabankans er geymdur þar í landi.

24 stundir leituðu eftir upplýsingum um það hjá Seðlabanka Íslands hversu langan tíma myndi taka fyrir bankann að innleysa gullforðann sem og erlend verðbréf sín og hverrar tegundar þau væru en fékk engin svör. Geir H. Haarde hefur hins vegar sagt að lausafjárvandinn yrði leystur á næstunni.