Í ljósi þess að Fjármálaeftirlitið hefur tekið yfir rekstur Kaupþings er tekið fram a vef Kaupþings að inneign sjóðfélaga í lífeyrissparnaði Kaupþings er aðskilin eignum bankans og ekki hægt að ráðstafa upp í skuldbindingar hans. Margir hafa talið að allur lífeyrissparnaður þeirra væri tapaður vegna þessa, en það er ekki svo.

Einhverjar eignir tapast

Sjóðfélagar hafa valið fjárfestingarleiðir sem eru með mismunandi vægi hlutabréfa, skuldabréfa og innlána. Ljóst er að eign í hlutum í Glitni, Landsbankanum og Kaupþingi mun tapast og hafa áhrif til lækkunar á ávöxtun leiðanna. Búast má við að hluti skuldabréfa, sem voru útgefin af sömu fyrirtækjum, muni tapast. Önnur skuldabréf í fjárfestingarleiðunum eru ríkisskuldabréf (sem eru með ríkisábyrgð), skuldabréf annarra fjármálafyrirtækja, sveitarfélaga og annarra fyrirtækja. Ríkið hefur ábyrgst innlán í fjárfestingarleiðum lífeyrisafurða í samræmi við nýsett lög.

Með setningu laga nr. 125/2008, þar sem kveðið er á um ábyrgð Tryggingarsjóðs innstæðueigenda og fjárfesta á innlánum lífeyrissjóða og annarra sjóða um sameiginlega fjárfestingu, er ljóst að fjárfestingarleiðirnar Lífeyrisauki 5 og Vista 5 eru í raun með ríkisábyrgð. Leiðirnar tvær byggjast eingöngu á verðtryggðum innlánum og eru verðtryggðir vextir í dag 7,55%.

Eignastýring Kaupþings hefur á þessu ári kerfisbundið minnkað áhættu í fjárfestingarleiðum lífeyrisafurða Kaupþings. Nýtt hafa verið vikmörk í fjárfestingarstefnu til að selja áhættumeiri verðbréf og keypt hafa verið í staðinn m.a. verðtryggð ríkisskuldabréf, að því er segir á vef Kaupþings.

„Í ljósi þess að ekki eru leyfð viðskipti með hlutabréf í Kauphöll Íslands er ekki hægt að reikna gengi fjárfestingarleiða lífeyrisafurða Kaupþings. Jafnframt er ekki hægt að framkvæma flutninga á milli fjárfestingarleiða og til annarra vörsluaðila á meðan þetta ástand varir. Þegar opnað verður á ný fyrir viðskipti í Kauphöll Íslands verða flutningsbeiðnir afgreiddar eins fljótt og mögulegt er. Sjóðfélagar eru beðnir afsökunar á þeim óþægindum sem þetta kann að valda.

Þeir sem hafa samband og vilja minnka áhættu á lífeyrissparnaði sínum geta óskað eftir flutningi inneigna milli fjárfestingarleiða innan sama sjóðs og verður sú beiðni afgreidd eins fljótt og mögulegt er eftir að opnað verður á ný fyrir viðskipti í Kauphöll Íslands. Fyrsti flutningur á milli leiða er ókeypis en síðari flutningar á almanaksári kosta 0,5%. Ef sjóðfélagar í Frjálsa lífeyrissjóðnum vilja flytja inneign sína í verðtryggð innlán, sem ríkið hefur ábyrgst, þá er hægt að flytja í Lífeyrisauka 5 með 1% kostnaði af fluttri fjárhæð," að því er segir á vef Kaupþings.