Þegar starfsfólk Kaupþings mætti til vinnu í gærmorgun beið þess tölvupóstur þar sem því var tilkynnt að fjármálaeftirlitið væri búið að taka yfir stjórn bankans. Starfsfólki var verulega brugðið en reyndi þó að bera sig vel.

„Við reyndum bara að halda starfseminni eins og hún á að vera,“ segir Svava Halldóra Friðgeirsdóttir, formaður starfsmannafélags bankans. „Fólkið er í óvissu og er að reyna að fylgjast með fréttum af því sem er að gerast,“ segir Svava en yfirmenn í hverri deild bankans hafi fundað með sínu fólki og reynt að stappa í það stálinu og láta fólk vita hvaða aðstoð sé í boði.

„Við höfum boðið upp á sálfræðiþjónustu og aðgang að trúnaðarlækni fyrir þá starfsmenn sem á þurfa að halda.“ Svava segir flesta reyna að bera sig vel. „Við bara knúsum hvert annað á kaffistofunni, það er lítið annað sem við getum gert, þetta er komið úr okkar valdi.“

Reiði gagnvart stjórnvöldum

Mörgum starfsmönnum bankans þykir með ólíkindum hvernig farið hefur fyrir bankanum sem flestir töldu öruggan. Mátti heyra á starfsmönnum sem 24 stundir ræddu við að þeir væru reiðir í garð stjórnvalda vegna þessa og segja „hreint með ólíkindum að misskilningur hafi leitt til hruns bankans“. Fréttir af uppsögnum 550 starfsmanna Landsbanka í gær hafi ennfremur bætt á óvissuna og óttast margir að erfitt verði að útvega öllum vinnu á næstu misserum.

Funduðu með ráðherra

Svipaða sögu er að segja meðal starfsmanna Glitnis. Ringulreið hefur ríkt meðal þeirra og hafa fjölmargir starfsmenn þegið þá áfallahjálp sem þeim hefur verið boðið uppá. Viðskiptaráðherra fundaði með starfsfólki bankans í gær, en nokkra furðu vakti meðal starfsfólks að hann skyldi ekki gera það sama dag og fjármálaeftirlitið tók yfir stjórn bankans.