„Ég og fjölskylda mín erum strandaglópar á Indlandi án nokkurra valkosta,“ segir Bala Kamallakharan sem starfað hefur hjá Glitni á Íslandi undanfarið tvö og hálft ár. Í byrjun árs var hann beðinn um að fara fyrir stofnun Glitnis á Indlandi og í ágúst flutti hann ásamt íslenskri eiginkonu sinni og dóttur þeirra til Mumbaí. Bala fylgdist grannt með gangi mála hér heima og varð vitaskuld afar áhyggjufullur þegar ríkið tók yfir 75% í Glitni fyrir tveimur vikum.

Í kjölfarið hefur öllum áætlunum, er varða Glitni í Indlandi, verið aflýst en Bala hefur hinsvegar engin svör fengið um hvað bíður hans næst. Hann er kominn hingað til lands til að fá að vita hvaða verkefni, ef einhver, bíða hans en á meðan situr fjölskyldan heima á Indlandi í algerri óvissu.

„Ég kom til Íslands til að fá svör, ég hef ekki hugmynd um hvað ég á að gera. Skilanefndin hefur alveg gleymt skrifstofum bankans erlendis, gleymt öllu fólkinu sem vinnur fyrir Glitni utan Íslands,“ segir Bala. „Ég hef engan pening fengið og það er búið að loka fyrirtækjakreditkortinu mínu svo ég get ekki greitt þau útgjöld sem mér var lofað að ég fengi greidd.“