Geir H. Haarde og Björgvin G. Sigurðsson á blaðamannafundi í Iðnó. mbl.is/Brynjar Gauti

Geir H. Haarde, forsætisráðherra, sagði á blaðamannafundi í dag, að ríkisstjórnin væri að vinna að því hvernig hægt yrði að koma því við að virkja stóran hóp fólks í þjóðfélaginu til að koma með hugmyndir um hvernig eigi að bregðast við núverandi stöðu í efnahagsmálum.

Geir sagði, að það væri forgangsverkefni að koma gjaldeyrismarkaðnum í lag. Nýi Glitnir væri að koma inn á gjaldeyrismarkaðinn sem myndi auðvelda gjaldeyrisuppboð á vegum Seðlabankans.

Björgvin G. Sigurðsson, viðskiptaráðherra, sagði að meðal þeirra verkefna sem nú væri unnið að, sé að halda utan um eignasafn bankanna í útlöndum.

Geir sagði aðspurður, að það væri af og frá að Tryggvi Þór Herbertsson hefði hætt störfum sem efnahagsráðgjafi hans vegna trúnaðarbrots. Sagði Geir að þeir Tryggvi Þór hefðu komið sér  saman um það í dag, að samstarf þeirra hefði ekki gengið sem skyldi og þeir hefðu komið sér saman um að hann hætti. Það hefði gerst í mesta vinskap.