Húsið við Keilufell þar sem árásin var gerð.

Við aðalmeðferð í Keilufellsmálinu svokallaða, sem hófst í morgun, varð að leiða þá sem urðu fyrir árásinni inn um bakdyr í dómsalinn því þeir kváðust óttast árásarmennina svo að þeir vildu ekki hitta þá auglitis til auglitis.  Aðeins tveir af sjö sem urðu fyrir árásinni mættu fyrir dóm.

Árásin sem var framin í Keilufelli laugardaginn 22. mars sl. var í senn einstaklega hrottafengin og ósvífin. Um átta árásarmenn ruddust þar inn á íbúa og gesti og gengu í skrokk á þeim með ýmsum bareflum.

Flestir sem að málinu koma, árásarmenn og fórnarlömb, eru pólskir. Sex voru handteknir skömmu síðar en rannsókn málsins leiddi til þess að fjórir voru ákærðir, allt pólskir karlmenn. Einn þeirra hefur setið óslitið í gæsluvarðhaldi frá lokum mars sl. en hinir eru í farbanni. Mennirnir fjórir eru ákærðir fyrir húsbrot og sérstaklega hættulega líkamsárás með því að hafa í félagi við aðra ruðst inn í húsið og veist að sjö mönnum sem þar voru í stofu og slegið þá ítrekað í höfuð og víðs vegar um líkama með hættulegum vopnum og bareflum, þ. á m. járnstöng, hamri, sleggju, gaddakylfu, golfkylfu, hafnarboltakylfu, hnífi og öxi. Þeir neita allir sök.

Aðalmeðferð málsins hófst í Héraðsdómi Reykjavíkur í morgun. Sá sem situr í gæsluvarðhaldi sagðist hafa fylgt öðrum mönnum í húsið en kvaðst hvorki geta lýst þeim né vissi hann nöfn þeirra. Hann játaði einungis að hafa slegið mann tvisvar með hafnarboltakylfu og það hefði hann gert vegna þess að maðurinn hljóp í áttina til hans og hann taldi að maðurinn hygðist ráðast á sig. Tveir ákærðu báru við minnisleysi um atburði sökum áfengis- eða fíkniefnaneyslu og einn neitaði að tjá sig.

Einn mannanna hlaut lífshættulega áverka og voru þær lýsingar sem fram komu á aðförinni á honum hvað hrottalegastar. Sá hlaut langa og djúpa skurði á andlit, augnbotn brotnaði og andslitsbein, hann brotnaði á vinstri handlegg, hlaut rifbrot og fleira.

Aðalmeðferð málsins var frestað til 27. október næstkomandi.

Nánar verður fjallað um málið í Morgunblaðinu í fyrramálið.