Innlent | mbl | 16.10.2008 | 11:19

Ekki framhjá lögum

Bakki við Húsavík þar sem fyrirhugað álver á að rísa. mbl.is

Ekki kemur til greina að fara framhjá lögum í landinu til að flýta frekar framkvæmdum við álver á Bakka, sagði Össur Skarphéðinsson, iðnaðarráðherra, á Alþingi í dag. Mörður Árnason, Samfylkingu, spurði hvort ríkisstjórnin ætlaði að bregðast við áskorun frá sveitarstjórum Norðurlands í Morgunblaðinu í dag.

Áskorunin er undirrituð af sveitarstjórum á svæðinu og fleiri aðilum og þar segir að í ljósi alvarlegara atburða í íslensku efnahagslífi þurfi að snúa vörn í sókn og nýta auðlindir landsins. Skorað er á ríkisstjórnina að gera allt sem í hennar valdi stendur til að hægt sé að taka ákvörðun um byggingu álvers á Bakka, þjóðinni til heilla.

Mörður sagði hug forystumanna á svæðinu hafa legið fyrir en þótti koma á óvart að því væri haldið fram að álversbygging á Bakka myndi leysa úr þeim atvinnuvanda sem skapast hefur vegna bankakreppunnar, einkum á suðvesturhorninu og í hópi fjármálastarfsmanna, verktaka o.s.frv.

Mörður sagði stefnu ríkisstjórnarinnar vera að byggja álver á Bakka og því virtist áskorunin til þess gert að gengið yrði framhjá umhverfismati og rammaáætlun.

Össur Skarphéðinsson tók undir að það væri stefna ríkisstjórnarinnar að byggja álver á Bakka og sagðist hafa gert það sem í hans valdi stæði til að flýta fyrir því. Hinsvegar stæði ekki til að breyta neinum lögum eða reglum en að vel mætti greiða úr þeim misskilningi sem hafi komið upp.