Sigurður Líndal

Eftir Magnús Halldórsson magnush@mbl.is

Sigurður Líndal, prófessor í lögfræði við Háskólann á Bifröst, segir ríkisvaldið vernda hagsmuni skattgreiðenda best með því að selja eignir banka á hæsta mögulega verði. Annað sé andstætt viðmiðum í lögum um sölumeðferð á eignum sem ríkið annast.

Á þeim forsendum þurfi skilnefndir Kaupþings, Landsbankans og Glitnis að taka afstöðu til þess hver fái eignir bankanna sem nú er unnið að því að meta og selja eftir atvikum. Miklir möguleikar eru á því að sala á eignum bankanna sem skilanefndirnar stýra verði umfangsmesta eignasala sem ríkisvaldið hefur haft umsjón með í Íslandssögunni.

„Almennt séð ber að selja eignirnar, sem ríkisvaldið vinnur að því að koma í verð, á hæsta verði. Meginreglan samkvæmt lögum er sú. Öll önnur viðmið eru andstæð anda laga um góða stjórnsýsluhætti og það á að vera hægt að gera þá lágmarkskröfu til skilanefndanna að ekkert annað en að gæta sem best hagsmuna fólksins í landinu ráði för þegar eignir verða seldar,“ segir Sigurður Líndal.

Fulltrúar fimm lífeyrissjóða hafa óskað eftir því við Fjármálaeftirlitið (FME) að ræða möguleg kaup á innlendri starfsemi Kaupþings og jafnvel fleiri eignum. Þetta eru Lífeyrissjóður verslunarmanna, Lífeyrissjóður starfsmanna ríkisins, Gildi lífeyrissjóður, Sameinaði lífeyrissjóðurinn og Lífeyrissjóðurinn Stafir.

Samkvæmt heimildum Morgunblaðsins hafa viðræður við aðra lífeyrisjóði átt sér stað, um mögulega aðkomu þeirra að kaupunum. Þær hafa ekki verið til lykta leiddar. FME hafði ekki svarað beiðni lífeyrissjóðanna en stefnt var að því að gera það sem fyrst, vegna þess hversu hratt eignir verðfalla vegna erfiðra markaðsskilyrða.