Heimsóknin hefði getað orðið gagnslaus og í versta falli hjákátleg
Forsetahjónin, Ólafur Ragnar Grímsson og Dorrit Moussiaeff mbl.is/Frikki
eftir Ágúst Inga Jónsson aij@mbl.is
„Okkur fannst hæpið að tefla á tvær hættur með slíka heimsókn. Hún gæti orðið gagnslaus og í versta falli hjákátleg miðað við þau verkefni dagsins sem bæði þarf að sinna hér heima og í Þýskalandi,“ segir Ólafur Ragnar Grímsson, forseti Íslands, aðspurður hvers vegna opinberri heimsókn forseta Íslands til Þýskalands var frestað á mánudag.
Hann sagði að opinber heimsókn af þessu tagi væri veigamikill leiðangur bæði forseta, ráðherra, æðstu embættismanna og annarra forystumanna. „Það hefur enginn maður, hvorki í Þýskalandi né hér, fullvissu fyrir því hvort aðstæður verða á þessum dögum seinna í október þannig að tækifæri gefist til að slík heimsókn geti farið fram með eðlilegum hætti.“
Ólafur Ragnar segir að heimsóknin hafi verið áformuð í meira en tvö ár. Þýskaland sé mjög mikilvægt land fyrir Íslendinga og þess vegna sé hæpið að tefla á tvær hættur með slíka heimsókn. Ráðamenn, ekki bara á Íslandi, heldur í flestum öðrum löndum Evrópu hafi nánast verið á neyðarvakt vegna erfiðleika í efnahagsmálum frá einum dagparti til annars og það sé ekki rétti tíminn fyrir opinbera heimsókn af þessu tagi.
Ólafur Ragnar var spurður hvort ekki væri brýnt að forseti Íslands og aðrir ráðamenn kæmu sjónarmiðum Íslands á framfæri á erlendri grundu, m.a. með opinberum heimsóknum, einmitt þegar ímynd Íslands virðist hafa beðið hnekki á erlendum vettvangi. Forsetinn sagði að vissulega væri það brýnt og það yrði verkefni næstu vikna, mánaða og ára. Margir þyrftu að koma að því verki.
„Þar þurfum við að nýta okkur þá velvild og þau góðu tengsl sem við eigum við fjölmargar þjóðir bæði í Evrópu og vestan hafs og núna á síðari árum bæði í Asíu, Mið-Austurlöndum og víðar.
„Ég er eindregið þeirrar skoðunar að bæði forsetinn og ráðamenn og forystumenn á öðrum vettvangi, líka listafólk, vísindamenn, háskólar, rannsóknastofnanir og nánast allur almenningur eigi að leggjast á árar til þess að styrkja á ný orðspor okkar og sess, sem því miður hefur beðið hnekki. Ekki bara vegna okkar eigin verka, heldur líka vegna þeirrar atlögu sem við urðum fyrir af hálfu oddvita bresku ríkisstjórnarinnar,“ sagði Ólafur Ragnar Grímsson.
