Unnið er að því hjá lífeyrissjóðunum að reikna út hver staða viðbótarlífeyris er nú. Viðbúið er að innistæðan muni rýrna vegna þeirra atburða, sem orðið hafa. Séreignarsparnaður nam 237,8 milljörðum um síðustu áramót.

Að sögn Tómsar Möller, framkvæmdastjóra Íslenska lífeyrissjóðsins, er þessari vinnu ekki lokið. Viðskipti með marga sjóði séu ennþá lokuð og á meðan svo er sé ekki hægt að sjá hvaða verðmæti standa á bak við bréf lífeyrissjóðanna. Tómas segir að öll iðgjöld, sem berast sjóðunum um þessar mundir, séu varðveitt á tryggum innlánsreikningum. Hann hvetur fólk til að halda áfram séreignarsparnaði. „Ef einhvern tíma hefur verið þörf á sparnaði er það núna.“

Arnaldur Loftsson, framkvæmdastjóri Frjálsa lífeyrissjóðsins, segir að unnið sé að þessum málum af fullum krafti hjá sjóðnum. Ennþá sé margt óljóst, sérstaklega hvað varðar skuldabréfahlutann.

Hann tók undir með Tómasi að fólk ætti að halda áfram að spara í viðbótarlífeyrissparnaði. Að öðrum kosti myndi fólk missa 2% í launum, þ.e. þann hluta sem vinnuveitandinn leggur á móti launþeganum. Sjóðfélagar, sem vildu minnka áhættu í lífeyrissparnaði, gætu greitt inn á verðtryggða innlánsreikninga sem ríkið hefði ábyrgst.