Tæki og tól í fíkniefnaverksmiðjunni. mbl.is

Lögreglan lýkur í dag við að taka niður tæki og tól í fíkniefnaverksmiðjunni í Hafnarfirði sem lokað var á fimmtudaginn. Friðrik Smári Björgvinsson, yfirlögregluþjónn í lögreglunni á höfuðborgarsvæðinu, segir rannsókn á málinu vera í fullum gangi en verst frétta af málinu að öðru leyti.

Þrír menn sitja í gæsluvarðhaldi, tveir í fangelsinu á Litla-Hrauni og einn í hegningarhúsinu við Skólavörðustíg. Eins og fram hefur komið voru tveir manna á reynslulausn. Jónas Ingi Ragnarsson, sem dæmdur var í tveggja og hálfs árs fangelsi fyrir þátt sinn í líkfundarmálinu svokallaða í Neskaupstað, og Tindur Jónsson, sem dæmdur í sex ára fangelsi fyrir sveðjuárás og fleiri líkamsárásir.

Að sögn Friðriks Smára liggur ekki enn ljóst fyrir hversu mikið af hvítu efni, sem talið er vera amfetamín, fannst á staðnum. Beðið er lokaniðurstöðu úr í greiningu og vigtun á efnum sem fundust í verksmiðjunni.