Aðalsteinn Baldursson

Samninganefnd stéttarfélagsins Framsýnar í Þingeyjarsýslum, hefur gengið frá kröfugerð á hendur Launanefnd sveitarfélaga. Kröfugerðin verður kynnt Launanefnd sveitarfélaganna á samningafundi á morgun.

Kröfugerð Framsýnar á hendur Launanefnd sveitarfélaga er í 17 liðum.  Þar er m.a. miðað við stuttan samning, um það bil sex mánuði, að sögn Aðalsteins Baldurssonar formanns Framsýnar.

"Þá er markmiðið líka að tryggja okkar fólki sambærilegar hækkanir og aðrir starfsmenn hjá ríki og sveitarfélögum hafa verið að fá," segir Aðalsteinn.

Núgildandi samningur aðildarfélaga Starfsgreinasambandsins við sveitarfélögin rennur út í lok nóvember 

Eftir því sem næst verður komist er Framsýn fyrst aðildarfélaga Starfsgreinasambandsins sem gengur frá kröfugerð á hendur Launanefnd sveitarfélaga. Framsýn hefur áveðið að fara sjálft með samningsumboðið í stað þess að vísa því til Starfsgreinasambandsins. Aðalsteinn Baldursson formaður segir að mikil þekking og reynsla sé til staðar hjá félaginu er varðar kjarasamningsgerð og því fari vel á því að félagið sjái sjálft um sín mál.

Verkalýðsfélag Þórshafnar hefur líkt og Framsýn ákveðið að framvísa ekki samningsumboði félagsins til Starfsgreinasambands Íslands vegna kjarasamnings Launanefndar sveitarfélaga og Starfsgreinasambandsins. Þess í stað hefur félagið óskað eftir samstarfi við Framsýn um gerð kjarasamnings við sveitarfélögin.