Kjötsúpudagur á Skólavörðustíg um helgina. mbl.is

Eftir Steinþór Guðbjartsson steinthor@mbl.is

Starfsmenn og eigendur Emmessíss hf. hafa samþykkt að taka á sig 10% launalækkun í fjóra mánuði til að ekki þurfi að koma til uppsagna. Lægst launaða fólkið heldur þó sínu.

Hrafn Hauksson, fjármálastjóri Emessíss, segir að stjórnendur fyrirtækisins hafi staðið frammi fyrir því að þurfa að segja upp fólki vegna efnahagsástandsins. Núna væri hins vegar slæmur tími til að missa fólk vegna mikils álags á næstunni auk þess sem ekkert sparaðist meðan fólk væri á launum í uppsagnarfresti. Því hafi komið upp sú hugmynd að lækka launin tímabundið og hafi starfsfólk tekið vel í það.

Hjá Emmessís starfa 35 manns og taka hátt í 30 manns á sig lækkunina. Hrafn segir að fyrirtækið reyni að koma til móts við þessa ákvörðun starfsmannanna með því að bjóða þeim fimm frídaga aukalega á tímabilinu. Fólkið geti ekki valið sjálft hvenær það taki þessa daga, heldur sé það ákvörðun stjórnenda með hliðsjón af verkefnastöðunni, en búast megi við miklu álagi um jól og áramót.

Hrafn segir að mikil deyfð ríki í þjóðfélaginu og óvissa um hvort fólk haldi vinnu sinni þegar nálgist mánaðamót auki á ótta þess. Ákvörðuninni hafi því fylgt ákveðinn drifkraftur hjá starfsmönnum Emmessíss. „Það var eins og vítamínsprauta inn í fyrirtækið þegar fólkið fann að við hugsuðum svona,“ segir hann. „Óvissan dregur fólk niður en með þessu höfum við útrýmt henni eins og við getum.“