mbl.is/Golli

Samband íslenskra námsmanna erlendis (SÍNE) vill, að námsmönnum erlendis verði gefinn kostur á að fá neyðarlán hjá Lánasjóði íslenskra námsmanna (LÍN) sem nemur allt að 500.000 krónum. Þetta lán verði veitt án kröfu um ábyrgðarmenn og á lægstu lánavöxtum LÍN, með venjulegum greiðsluskilmálum sjóðsins.

SÍNE segir, að þessi upphæð byggi á þeirri forsendu námslána að námsmenn hafi um milljón króna í tekjur á ári hverju til að brúa bilið milli framfærsluláns og raunverulegs framfærslukostnaðar. Í ljósi þróunar gengis krónunnar sé ljóst að sjálfsaflafé námsmanna hafi rýrnað að virði erlendis um helming frá því  sem var þegar reglur LÍN voru endurskoðaðar í vor.

Námsmenn erlendis eru um 3000 talsins. Segir SÍNE, að því megi reikna með lánveitingu að upphæð að hámarki 1500 milljónum króna vegna þessara aðgerða eða sem nemur 25% af framlögum til sjóðsins í fjárlagafrumvarpi 2008, 19% af framlögum til sjóðsins í fjárlagafrumvarpi 2009.

SÍNE segir, að lán námsmanna erlendis og sjálfsaflafé dugi ekki lengur fyrir skólagjöldum og lágmarksframfærslu. Hætta sé á að fjöldi námsmanna erlendis muni af fjárhagsástæðum þurfa að hætta eða fresta námi ellegar berjast í bökkum til að eiga í sig og á í námslandinu.

SÍNE segist líta svo á að samkvæmt hljóðan laga um Lánasjóðinn, sem samþykkt voru á Alþingi, beri Lánasjóðnum skylda til að grípa til aðgerða enda fullnægi sjóðurinn  engan veginn lögboðnu hlutverki sínu eins og aðstæður séu nú.