Alþingishúsið mbl.is/Golli

Eftir Höllu Gunnarsdóttur halla@mbl.is

Endurfjármögnun  bankanna og Seðlabanka Íslands og sá halli sem verður á ríkissjóði á næsta ári mun kosta í kringum 700 milljarða króna. Láninu frá Alþjóðagjaldeyrissjóðnum (IMF) er hins vegar ekki ætlað að koma til móts við þennan kostnað heldur einungis að styrkja gjaldeyrisvaraforðann.

Þetta kom fram í máli Friðriks Más Baldurssonar, sem hefur haft umsjón með viðræðum við IMF, á opnum fundi efnahags- og viðskiptanefndar Alþingis í gær en hann kom fyrir nefndina ásamt Ásmundi Stefánssyni, sem vinnur að því að samræma viðbrögð stjórnvalda. Það var stjórnarandstaðan í þingnefndinni sem fór fram á þennan fund, sem opinn var bæði almenningi og fjölmiðlum.

Friðrik sagði samkomulagið sem náðist við sjóðinn byggjast á áætlun íslenskra stjórnvalda. Hún miðaði að því að endurheimta efnahagslegan stöðugleika en gert er ráð fyrir allt að 10% samdrætti í landsframleiðslu á næsta ári. Þó er áætlað að samdrátturinn verði skammvinnur og ætlaði Friðrik að hagvöxtur næði sér á strik aftur árið 2010. Hann lagði jafnframt áherslu á að ekki stæði til að reyna að ná jöfnuði á ríkissjóði á næsta ári enda myndi það auka enn á niðursveifluna.

Fólk og fyrirtæki haldi ró sinni

„Sérstaklega ber að benda á það að útflytjendur mega ekki halda að sér höndum og bíða þess að krónan nái einhverjum botni,“ sagði Friðrik og lagði áherslu á að fá gjaldeyristekjur til landsins.