Rólegt er í húsakynnum ríkissáttasemjara um þessar mundir. Ástæðan er fyrst og fremst óvissan í efnahagsmálunum. Þá hefur Ásmundur Stefánsson ríkissáttasemjari tekið að sér það hlutverk að samhæfa starf þeirra hópa, sem vinna að lausn efnahagsvandans. Hann hefur einbeitt sér að því starfi undanfarnar vikur.

Að sögn Elísabetar Ólafsdóttur, skrifstofustjóra hjá ríkissáttasemjara, er kjaradeila sjómanna og útvegsmanna stærsta einstaka málið, sem er til meðferðar hjá embættinu. Til stóð að halda fund í deilunni í síðustu viku, en honum varð að fresta vegna ársfundar Alþýðusambands Íslands. Þá verða engin fundahöld í þessari viku vegna ársfundar Landssambands íslenskra útvegsmanna.

Nokkur félög og viðsemjendur þeirra sitja fundi í húsnæði ríkissáttasemjara, sem ekki hafa vísað deilu sinni til hans ennþá.

Samningar margra stéttarfélaga renna út á þessu hausti og um næstu áramót. Um næstu mánaðamót renna út samningar fjölmargra félaga við Reykjavíkurborg. Má þar nefna samninga Eflingar, Starfsmannafélags Reykjavíkurborgar, náttúrufræðinga, iðjuþjálfa, sjúkraþjálfara, félagsfræðinga og verkfræðinga. Þá renna samningar Blaðamannafélags Íslands við viðsemjendur út um mánaðamótin.

Mjög margir samningar renna út 30. nóvember. Má þar til nefna samninga rafiðnaðarmanna og fjölda félaga, eða 74 alls, sem eru með samninga við launanefnd sveitarfélaganna. Inga Rún Ólafsdóttir, sviðsstjóri kjarasviðs Sambands íslenskra sveitarfélaga, hefur látið hafa eftir sér að þetta verði ekki samningar stóru tækifæranna.