Þjóðin í gíslingu Sjálfstæðisflokksins
Frá borgarafundi í Iðnó á mánudagskvöld um ástand efnahagsmála. mbl.is/Golli
„Það vekur undrun að leiðtogar Sjálfstæðisflokksins, sem fyrst og fremst bera ábyrgð á þeirri peningamálastefnu sem komið hefur þjóðinni á vonarvöl, skulu enn þvælast fyrir skynsamlegum lausnum, á erfiðri leið út úr vandanum. Þeir dæla olíu á þann eld sem þeir segjast vera að slökkva og halda þjóðinni í gíslingu flokksins á meðan,“ segir Skúli Thoroddsen, framkvæmdastjóri Starfsgreinasambands Íslands.
Skúli segir í pistli á heimasíðu Starfsgreinasambandsins að hvert sem litið er, hvort heldur til Samtaka atvinnulífsins, Viðskiptaráðs Íslands eða ársfundar Alþýðusambands Íslands, sé krafan um aðildarviðræður við ESB og hugsanlega inngöngu landsins í sambandið á dagskrá.
Endurskoðun peningamálstefnunnar þoli að sama skapi enga bið og sé þeim mun brýnni í þeim efnahagslegu hamförum sem nú ríða á þjóðinni.
„Þessir aðilar eru allir sammála um, að liggi fyrir afstaða eða ákvörðun að hefja umsóknarferli að ESB-aðild, sé það til þess fallið að lina þær efnahagslegu þjáningar einstaklinga, heimila og fyrirtækja sem óhjákvæmilega verða á næstunni. Endurreisn efnahagslífsins yrði kvalaminni,“ segir Skúli Thoroddsen og bæitr við að Samfylkingin sé duglaus í málinu.
„Samfylkingin, því miður, virðist ekki hafa dug til að ryðja þjóðinni braut úr gíslatökunni þrátt fyrir skýra stefnu í Evrópumálunum. Hin pólitíska stefnumörkun sem hrópað er eftir, bæði af aðilum vinnumarkaðarins, Verslunarráðinu og fólkinu í landinu, situr á hakanum,“ segir framkvæmdastjóri Starfsgreinasambandsins.
