Ingibjörg Sólrún Gísladóttir. mbl.is/Ómar

Ingibjörg Sólrún Gísladóttir, utanríkisráðherra, hefur að sögn breska blaðsins The Independent, sent breskum þingmönnum bréf þar sem hún gagnrýnir bresk stjórnvöld harðlega fyrir aðgerðir þeirra gegn íslensku bönkunum fyrr í þessum mánuði.

Blaðið segir, að í bréfinu fordæmi Ingibjörg Sólrún þá ákvörðun breskra stjórnvalda að beita lögum um varnir gegn hryðjuverkum til að frysta eignir Landsbankans. Þá segir hún að ummæli breskra ráðamanna hafi valdið gríðarlegu tjóni á Íslandi.

Ingibjörg Sólrún sakar bresk stjórnvöld einnig um að vekja upp andúð gegn Íslandi og þar með hættu á að Íslendingar, sem heimsæki Bretland, verði fyrir aðkasti.

„Íslendingar sem þjóð hafa allir verið tjörubornir með sama penslinum og hafa orðið fyrir raunverulegu aðkasti í nokkrum tilfellum," segir í bréfinu að sögn Independent.

Í bréfinu vísar Ingibjörg Sólrún til hryðjuverkalaganna og þess að Landsbankinn var á heimasíðu breska fjármálaráðuneytisins spyrtur saman við al-Qaeda og talibana. Þá hafi aðgerðir Gordons Browns, forsætisráðherra, leitt til þess að viðskipti milli þjóðanna tveggja væru nú afar stirð. „Ég vona að við getum endurreist hin mjög jákvæðu og traustu tengsl Bretlands og Íslands," segir hún síðan.

Austin Mitchell, þingmaður Verkamannaflokksins og formaður þingmannahóps sem sér um samskipti Íslands og Bretlands, segir við Independent að hann hvetji David Miliband, utanríkisráðherra, til að beita sér í málinu.

„Ríkisstjórn okkar hefur beitti afar harkalegum aðgerðum þegar hún fékkst við íslenska vandamálið. Við hefðum átt að rétta fram hjálparhönd en þess í stað fórum við fram með offorsi og gerðum illt verra," segir hann og bætir við að erfitt verði að vinda ofan af yfirlýsingunum.

Blaðið segir að utanríkisráðuneytið fullyrði að enn séu traust tengsl milli NATO-ríkjanna tveggja en ítrekar, að réttmætt hafi verið að beita lögunum umdeildu þegar ógn steðjaði að fjárhagslegu öryggi Breta.

Haft er eftir ráðuneytinu, að Alastair Darling, fjármálaráðherra, hafi fyrirskipað að eignir Landsbankans yrðu frystar eftir að íslenska bankakerfið fékk neyðarlán bæði frá íslenska og sænska seðlabankanum. 

Frétt Independent